चितवन । नेकपा ( एकीकृत समाजवादी ) का अध्यक्ष माधवकुमार नेपालले सबै किसिमका
भ्रष्टाचारका विरुद्धमा दृढताका साथ उभिने बताउनु भएको छ । बिहीबार पार्टीको
राप्ती नगर कमिटी चितवनको भेलालाई सम्बोधन गर्दै अध्यक्ष नेपालले भ्रष्टाचार गर्नेहरु जुनसुकै पार्टीका नेता वा विशिष्ट व्यक्ति भए पनि उन्मुक्ति पाउन नहुने
बताउनु भएको हो ।
“हामी स्वच्छ राजनीति गर्न चाहान्छौँ । हामी स्वच्छ राजनीतिसँगै सुशासनको पक्षमा छौँ । भ्रष्टाचार गर्ने जोसुकै
व्यक्ति वा दललाई जनताले दण्डित गर्नुपर्छ”, अध्यक्ष नेपालले
भन्नुभयो । बिना पैसा काम नहुने परिपाटी अन्त्य हुनुपर्ने बताउँदै अहिले सबै
क्षेत्रमा भ्रष्टाचार फैलिएकाले भ्रष्टाचारीलाई जनताले नै दण्डित गर्नुपर्ने
उहाँले बताउनु भयो ।
अध्यक्ष नेपालले भन्नुभयो , “हाम्रो पार्टी
सुशासन, जनताको पक्षमा छ । जनतालाई रोजगारी उपलब्ध गराउने,
कृषि, उद्योग, जलस्रोत,
पर्यटन, शिक्षा, स्वास्थ्य,
विज्ञान प्रविधिलगायत क्षेत्रको विकास गर्दै देशलाई अघि बढाउन दृढ छ
।” पार्टीलाई नयाँ उचाइमा पुर्याउनका लागि सबै नेता र कार्यकर्ता गाउँ, टोलसम्म पुगेर जनताका समस्या समाधान गर्दै अघि बढ्नुपर्ने उहाँको भनाइ
थियो ।
अध्यक्ष नेपालले जनताको सङ्घर्षबाट नेपाल सङ्घीय लोकतान्त्रिक
मुलुकका रुपमा अगाडि बढेको बताउँदै जनताका उपलब्धि खोस्ने छुट कसैलाई नभएको उल्लेख
गर्नुभयो । , “अब जनताका दिन सुरु भएका छन् । मधेशी जनताको छोरो
राष्ट्रपति बन्नसक्ने अवस्था हामीले बनाएका छौं । नेपाली छोरी राष्ट्रपति बन्ने
सुनिश्चित बनाएका छौँ । यो हामीले जनताको शक्तिको उपजमा प्राप्त गरेका हौँ ।”
उहाँले भन्नुभयो ।
आयोजक कमिटीका अध्यक्ष राम सेढाइँकोसभापतित्वमा भएको कार्यक्रममा पार्टीका उपमहासचिव गङ्गाराज तुलाधर, बागमती प्रदेश सदस्य सुमिता डल्लाकोटी, राप्ती नगरपालिकाका प्रमुख शमशेर लामालगायतले आ–आफ्नो धारणा राख्नुभएको
थियो । भेलाले रामकृष्ण पण्डितको अध्यक्षतामा ५१
सदस्यीय नगर कमिटी गठन गरेको छ ।
0 Comments